- Máis de 900 escolares de toda España, de entre 6 e 12 anos, participaron na segunda edición deste concurso de debuxo
- Tres escolares de Mondragón, Sevilla e Toledo, respectivamente, foron os gañadores en cada unha das tres categorías do premio
- O cociñeiro Peio Gartzia encargouse novamente de facer realidade os debuxos e convertelos nuns deliciosos e saudables pratos que se recompilaron nun libro
- O certame enmárcase no programa educativo “Enerxía para Medrar” da Fundación EROSKI que na súa actual cuarta edición xa alcanza unha participación de 75.000 escolares
Elorrio, 18 de abril do 2016.- A Fundación EROSKI entregou os premios da segunda edición de “Imagine Food”, un concurso de debuxo dirixido a escolares de entre 6 e 12 anos. A proposta busca concienciar o alumnado, profesorado e pais da importancia que ten a alimentación na saúde e demostrar que comer san pode ser saboroso e divertido. O concurso contou nesta nova edición coa colaboración de Unilever.
Na categoría de escolares do primeiro ciclo de Primaria (1º e 2º) a gañadora foi Lucía Olveira do Colexio Tirso de Molina en Argés (Toledo) coa súa proposta Verdufish amoroso. Na categoría de escolares do segundo ciclo de Primaria (3º e 4º) resultou gañadora Irati Unamuno de Arizmendi Ikastola en Mondragón (Guipúscoa) coa súa receita Unibertsoa. Na categoría de escolares do terceiro ciclo de Primaria (5º e 6º), a proposta Espadachines de Rafael Carracedo do Colexio Alfares en Sevilla resultou vencedora. Aos tres gañadores entregóuselles unha bicicleta e a cada centro educativo 2.000 euros para investir na mellora das súas instalacións, especialmente daquelas que poidan facilitar unha vida máis saudable.
“A boa acollida da primeira edición de Imagine Food animounos a poñer en marcha de novo a experiencia e o resultado foi extraordinario, con 908 debuxos, fronte aos 550 da primeira edición, e cun volume de tráfico á web do concurso con máis de 90.000 visitas e máis de 65.000 usuarios únicos entre as dúas edicións. Para a Fundación EROSKI educar os cativos en alimentación saudable é un obxectivo primordial e coidamos que o mellor xeito de facelo é a través de actividades lúdicas como este concurso, que se está revelando como unha eficaz plataforma para aprender a comer de maneira equilibrada”, sinalou Alejandro Martínez Berriochoa, director da Fundación EROSKI.
O criterio para a selección dos tres debuxos gañadores baséase na orixinalidade, na estética e na idoneidade desta receita para formar parte dun menú equilibrado. Os debuxos finalistas do concurso levounos do papel ao lume o cociñeiro Peio Gartzia, que novamente se encargou de facelos realidade e de convertelos nuns deliciosos e saudables pratos. Ademais, as trinta receitas finalistas recompiláronse nun libro a carón dos debuxos orixinais e do semáforo nutricional de cada prato.
O xurado, formado por representantes da Escola de Alimentación EROSKI, cociñeiros profesionais e membros do Basque Culinary Center, seleccionou os 30 concursantes finalistas. Os mozos participantes rexistrados na páxina web votaron posteriormente de entre os finalistas os seus dez favoritos. Posteriormente, o xurado determinou os tres debuxos gañadores de entre os mellores clasificados.
Cuarta edición do Programa Educativo “Enerxía para Medrar”
Este concurso forma parte das actividades que acompañan a cuarta edición do Programa Educativo sobre Alimentación e Hábitos Saudables (PEAHS), Enerxía para Medrar, da Fundación EROSKI. Na súa actual cuarta edición (curso 2015-2016) o programa continúa a aumentar o número de participantes e xa superou a participación de 75.000 escolares de 900 escolas de toda España. No global das súas catro edicións o 15% das escolas de Primaria de España participaron no programa Enerxía para Medrar.
